Skip to content
【菲林入門101】如何沖掃菲林?手沖、機沖、黑房?解構沖菲林5大迷思!

【菲林入門101】如何沖掃菲林?手沖、機沖、黑房?解構沖菲林5大迷思!

on

好多客人都會上嚟沖菲林,但其實你哋又知唔知菲林究竟係點沖?有咩步驟?好多人第一時間諗到嘅都係黑房,但其實沖菲林唔係下下都要入黑房㗎😗 今次 #菲林入門101,小編一於同大家講解吓普遍135菲林 (35mm) 究竟係點樣沖❗手沖、機沖、黑房沖又有咩分別❗為你拆解沖菲林5️⃣大迷思❗

1️⃣ 菲林沖洗過程

菲林可以手沖、機沖,都可以喺黑房入面沖,三隻會有小小程序上增減與不同,下文會詳細啲講解,但想沖菲林,令底片上影像被顯示出來,大原則其實都一樣 — 首先,要將底片從菲林筒中抽出;之後,使用藥水來為底片進行顯影、停影與定影;然後,利用清水沖洗,將底片表面化學物質沖走;最後,將底片晾乾 / 風乾,一卷嘅菲林就沖好啦🎊

2️⃣ 曬菲林❎ vs 沖掃菲林✅

好多客人上嚟會話想「曬」菲林,當然同事會明白你係想沖菲林,要Digital相,但正確嚟講,應該係叫做「沖掃」菲林 —「沖」代表上文所述嘅沖洗過程,將影像留喺底片上面;「掃」則代表將已沖好、有影像嘅底片掃瞄,Scan入電腦,最後你會得到相片嘅數碼檔案Soft Copy,同埋已沖好嘅底片,就咁沖掃係唔會有實體相架 (除非額外要求印相,見下文)!

3️⃣ 曬相 vs 印相

可能你會話:「吓,但我真係想曬相,想要菲林實體相喎🤔」留意返,實體相都有分曬相vs印相,光學沖曬 (曬相) 與數碼打印 (印相) 係兩回事❗光學沖曬係以前年代嘅產物,當時未有數碼掃瞄與打印技術,大家影完菲林想睇返張相,就要進行光學沖曬,又稱放相,利用放大機,將已沖好嘅底片影像,透過光線投射落相紙上,再進行顯影、定影、沖洗,將菲林影像呈現喺相紙上,現時數碼年代,香港已少有呢種人手Print相傳統式沖曬。而家常見嘅就係數碼打印,將已掃瞄入電腦嘅電子檔菲林相打印出嚟,令你得到睇得到又摸得到嘅實體相🖼️ 我哋舖頭現時亦只有提供印相服務,所以上到嚟想要實體相,嚴格嚟講都要留意吓正確用字喔~

4️⃣ 手沖🖐🏻 vs 機沖🖥️

沖菲林唔係好似拍電影咁,下下都要入黑房,更常見嘅係黑袋+沖罐手沖,以及機沖,咁樣已經可以做到一個全黑環境去處理同沖洗菲林。黑袋+沖罐手沖,就係喺黑袋入面抽菲林頭,以及放菲林入沖罐,等菲林唔好曝光,之後依次將藥水倒入沖罐,進行攪動,再沖洗以及晾乾,菲林就沖好㗎啦。至於機沖,成件事就更簡單,人手要做嘅就係抽菲林頭,放入機器,機器就會用藥水自動進行上文所述嘅顯影、定影、沖洗、風乾~

5️⃣ 黑房

如果手沖同機沖已經可以做到全黑環境沖菲林,咁黑房用嚟做咩?就係用嚟進行上文提及過嘅光學沖曬!光學沖曬嘅原理係利用光源令相紙曝光、「吸收」影像,要控制光源,自然要用到絕對無其他光源嘅環境,亦即係黑房。

除此之外,黑房亦會用嚟沖特別格式或類型嘅菲林,例如濕版攝影、大片幅菲林等,呢啲大到放唔到落沖罐嘅菲林 (唔識分唔同片幅嘅新手,可睇返 #菲林入門101 菲林片幅大解構)。另外都會有用家喺黑房自捲、分裝、甚至人手製作菲林,基本上如果想伸手見到五指,又唔想影響菲林嘅情況下處理菲林,黑房就係一個合適嘅地方。

可能你又會問:「吓,乜黑房唔係要全黑㗎咩,咁點解睇到嘢?」黑房裏面會有盞紅燈用作照明,叫做「安全燈(Safelight)」,其光線對於相紙嘅敏感度最低,適用進行相紙處理。

今次不經不覺又打得好長啦,鍾意嘅話like、comment、share🥺小編會繼續努力😤💪🏻 為大家帶嚟更多豐富小知識,預告一下,下週會繼續講吓沖菲林,拭目以待,我哋下週再見👋🏻

Leave your thought here

Please note, comments need to be approved before they are published.

Related Posts

【菲林入門101】入坑120菲林前必讀!7個你不可不知的基本知識
May 28, 2024
【菲林入門101】入坑120菲林前必讀!7個你不可不知的基本知識

很多人玩菲林,玩了一陣子都會想挑戰一下自己,嘗試不同菲林、不同相機、不同拍法,甚至考慮拍不同片幅規格,135當然是入門級,再進一步就是中片幅的120,但相信每個人入坑前總會有各種疑問浮現腦中:我適合拍120嗎?我需要拍120嗎?有甚麼分別?有甚麼好處? 今次菲林入門101為曾經都有相同煩惱的大家,提供一切解答!

Read More
【菲林入門101】黑白菲林界王者!英國百年品牌ILFORD 黑白菲林大全
May 22, 2024
【菲林入門101】黑白菲林界王者!英國百年品牌ILFORD 黑白菲林大全

ILFORD這個英國菲林品牌,相信大家都毫不陌生,多年來專營黑白底片市場,在黑白菲林界可謂沒有對手。但ILFORD的黑白菲林底片眾多,又有Delta,又有FP4、HP5等等,如何分辨?如何選擇?今次菲林入門101為大家分門別類,介紹4大系列給大家,以及詳細看看其中6款人氣黑白菲林的分別!

Read More
Drawer Title
Similar Products