好多客人會問我哋：有咩相機推介畀新手🤔？雖然同事們定會循循善誘，務求幫大家揀啱心水，但其實有時都幾難答🤯 因為揀咩相機好視乎大家嘅預算、用途、經驗等，加上菲林相機種類繁多，都要睇大家偏好，所以今次 #菲林入門101 就決定以135相機為主，先教大家最基本知識👉🏻 分辨菲林相機3️⃣大種類，等大家起碼知道唔同機種嘅特性，唔使揀相機時咩都唔識懵盛盛❗
註：唔知咩係135嘅新手，可以先睇返「菲林片幅大解構」
1️⃣ SLR單反 (全稱：單鏡反光相機 Single Lens Reflex Cameras)
可換鏡頭嘅單反相機係菲林相機中最常見，相機內有反光鏡，透過反光鏡將鏡頭前嘅景物光線反射到對焦屏，再透過五菱鏡得到正像取景，所以喺觀景窗睇到嘅，就係最終所得影像，即「所見即所得」。
「所見即所得」喺現代數碼攝影看來理所當然，就連電話都做到。但喺菲林攝影中並唔係咁簡單，除單反外，旁軸機、傻瓜機等無反光系統嘅相機都有視差問題，即最終所得影像同觀景窗所見有差距。
單反相機分為機械式機身同電子式機身，以前者為主：
❑ 機械式機身好處係光圈、快門、ISO都可以自己決定；缺點係只能手動對焦
❑ 電子式機身好處係只要搭配有對焦摩打嘅鏡頭，就可以自動對焦，當然都可以手動對焦；缺點係有啲機身會自動判讀底片殼上DX碼，無法手動設定底片ISO
👍🏻優點
⓵ 可換鏡頭，包括廣角、標準、望遠、微距等鏡頭
⓶ 所見即所得，觀景窗所見，就係最終所得影像
⓷ 有高速快門可選擇 (最少都有1/1000s)
⓸ 對焦距離較短，方便近攝
⓹ 相同系統鏡頭可於數碼機身使用
👎🏻缺點
⓵ 由於有五稜鏡及反光鏡組件，單反體積較大，重量亦較重
⓶ 影相時㩒快門，反光鏡升起產生嘅震動，可能造成慢速快門時嘅影像郁動
⓷ 快門聲較大
⓸ 按下快門時無法進行觀景 (viewfinder blackout)
⓹ 鏡頭後需要預留空間畀反光鏡，令廣角鏡容易造成影像變形
📸例子：Canon AE-1、Nikon FM2
2️⃣ RF旁軸相機 (全稱：旁軸測距相機 RangeFinder Cameras)
旁軸相機，又稱連動測距式相機，利用機身測距儀，同目標影像計算距離，再以鏡頭同機身嘅連動做到正確對焦。同單反「所見即所得」唔同，旁軸相機嘅鏡頭同觀景窗獨立存在，無直接光學關聯，即使唔打開鏡頭蓋，觀景窗都照樣睇到畫面，取景光軸喺鏡頭光軸「旁側」，因而得名「旁軸相機」。
常見對焦方法係黃斑對焦，靠觀景窗內嘅疊影區對焦，兩者影像重疊，即完成對焦。相比單反，旁軸相機無反光鏡組件，體績細好多，更方便攜帶。
旁軸相機分為可換鏡頭與不可換鏡頭
❑ 可換鏡頭：機身價錢一般較高，鏡頭都要另外再買，屬於高端、小眾，如Leica M系列、Contax G2、Nikon SP
❑ 不可換鏡頭：以日系機種為主，體積較細，成像優異，但相比之下黃斑較淡，無咁易對焦
👍🏻優點
⓵ 體積比單反細，以能夠全手動及準確對焦而言，旁軸機相對輕巧，唔礙眼
⓶ 無反光鏡構造，㩒快門時嘅震動輕巧得多，無咁容易造成影像郁動
⓷ 快門聲音寧靜
⓸ 㩒快門時依然能夠進行觀景
⓹ 鏡頭後鏡組更接近焦平面，廣角鏡變形控制更佳，成像更好
👎🏻缺點
⓵ 有視差問題，觀景窗同鏡頭分開，最終所得影像同觀景窗所見會有差距
⓶ 快門速度最快唔超過1/1000s
⓷ 最近對焦只到0.7m，唔適宜近攝
⓸ 唔適宜用長焦鏡：觀景窗所見範圍固定，若更換鏡頭，只會喺觀景窗內部出現相對應框線，使用長焦鏡時嘅框選範圍相當狹窄，使用困難，所以旁軸相機嘅長焦鏡多數只到90mm
📸例子：Leica M系列相機、旁軸七劍 (欲知更多可Google)
3️⃣ P&S傻瓜機 (全稱：隨身傻瓜相機 Point and Shoot Cameras)
傻瓜機之所以為傻瓜機，皆因機身一般全自動操作，相機可自動處理對焦、回捲等，大多已內置閃光燈同日期，只需要入菲林同㩒掣就可以影相。嚴格嚟講，傻瓜機都係旁軸，只不過係電子、自動化嘅旁軸。
如果你係新手，光圈、快門對你嚟講好複雜，唔想深究機械操作 / 攝影原理，單純享受㩒快門記錄生活，咁傻瓜機係好選擇，畫質優秀兼具自動對焦，能全方位滿足日常各種需求，多款式選擇，而且輕巧易攜，一般只有口袋般大細，最平可以去到幾百元一部，性價比極高！
不過，留意返，$2500-$3000係一個分水嶺，$2500以上嘅P&S就算係高階隨身機，功能同鏡頭素質媲美單反相機✨
👍🏻優點
⓵ 輕便易攜、對焦快速
⓶ 多數內置閃光燈
⓷ 自動上片
⓸ 成像品質唔錯，性價比高
👎🏻缺點
⓵ 手動操作自由度減低
⓶ 故障維修唔方便
⓷ 氣候會影響相機使用
⓸ 價錢不斷上升
📸入門：Kodak M35、Olympus Mju
📸高階：Contax T3、Minolta TC-1、Nikon 35Ti
睇完詳盡解釋後，大家應該對以上三種菲林相機熟咗好多啦！不過其實菲林相機種類邊止咁少，下次 #菲林入門101 將會繼續為大家講解埋另外3️⃣種菲林相機，拭目以待，Stay Tuned❣️
