上集 #菲林入門101 教咗大家分辨菲林相機入面最常見嘅3️⃣大類 — 單反、旁軸、傻瓜機，今次Part 2，小編就同大家介紹埋另外三種菲林相機，有比較冷門難用嘅估焦相機，都有近年好流行嘅即棄菲林相機同半格相機📸

1️⃣估焦相機

估焦相機，機如其名，要自己估算同被攝物嘅距離，進行對焦。使用其他相機好似單反、旁軸時，扭動對焦環，能夠透過觀景窗睇到自己是否中fo，但估焦機嘅觀景窗，即使你扭fo，都唔會睇到有任何改變，無辦法經由觀景窗確認對焦狀況，係完全靠自己預估被攝物同機身嘅距離來對焦。

如果對光圈有基本概念，縮光圈，景深會變深，達到泛焦，例如光圈F8時，對喺3m嘅位置，咁2-5m嘅範圍都會係清晰。其實大部份入門估焦相機，都已經將所有可以合焦嘅距離分成3-5段，相比無段嘅估焦來得易上手，都有啲相機廠商會喺相機對焦環上加上小人像圖示，俾大家影相時參考住對焦，大概知道影大頭、半身、全身時要調到邊個距離。如果剛上手 / 純影風景嘅人就可以每張都調到無限遠，就包保fo到，但就會喪失淺景深效果。

估焦相機其實源遠流長，喺技術受限嘅60至80年代相當相見，對焦結構就做喺鏡頭上，機身無其他結構，無複雜嘅光學結構、無測距、無合焦提醒，所以普遍體積唔大，可以做到只有一部手機左右嘅大小。(熱愛菲林攝影嘅英女皇都有一部估焦相機Rollei 35!)

👍🏻優點

⓵ 快門超級細聲：估焦相機使用鏡間快門，㩒快門時，只有快門會打開，光圈無收放動作，都無反光鏡升降或幕簾開關聲，所以特別細聲
⓶ 輕巧方便：省去對焦結構，體積可以細到只有手掌大小

👎🏻缺點

⓵ 3米內嘅距離難以計算
⓶ 觀景窗無法確認對焦成功與否，只能用作取景
⓷ 唔適合對光圈景深無概念嘅新手

📸例子：

Rollei 35、Olympus Trip 35、Konica C35 EF、Minolta Hi-Matic SD、Fujifilm Flash Fujica Date、Minox 35 GT

2️⃣即棄菲林相機 Single Used Cameras

市面上一般即棄菲林相機嘅配置都不外乎為F/10光圈、 1/100快門、ISO400或以上、毋須對焦嘅廣角鏡頭以及內置閃光燈，一部27-36張，影完一次就用完，成部拎去沖洗，無得再重用。 (詳盡介紹見：instagram.com/p/Cr8BLmUBbTS)

👍🏻優點

⓵ 價錢及操作入門門檻最低
⓶ 多數內置閃光燈

👎🏻缺點

⓵ 一次性使用
⓶ 無法設定光圈、快門、ISO、對焦

📸例子：

Fujifilm QuickSnap Simple Ace、Kodak FunSaver、Kodak HD Power Flash、Kodak Tri-X 400

3️⃣半格相機

半格相機同樣使用135菲林，但片幅為135全格嘅一半 (24x18mm)，即係將全格喺中間切開，變直倒，所以半格嘅相片數量比起全格多一倍，一卷135菲林，36張可影72張，24張影48張，如此類推。

掃描方面，你可以選擇以半格方式 (半格一張相) 或全格方式 (兩格一張相) 掃描，而一般市面上默認以及較受歡迎都係後者，成像係打橫一張相，中間一條黑線，分隔開左右兩個打直嘅影像，好多人都會運用半格相呢個特性，拍攝出有趣味性、故事性嘅連環圖，係半格相機最獨一無二嘅優點。

另外，不同於全格相機嘅橫倒觀景窗，半格相機嘅觀景窗直接就係打直直倒，原理係喺快門簾前置上半塊膠片，令視窗只顯示半格，而過片捲菲林，都會比平時用全格相機捲少半圈。半格機亦有分可換鏡頭或不換鏡頭兩種，以不可換鏡較多。

👍🏻優點

⓵ 相片數量比起全格多一倍
⓶ 一張相兩格，具故事連貫性
⓷ 體積輕巧，操作簡單

👎🏻缺點

⓵ 單張掃瞄 / 後期裁切會有畫質不佳及顆粒較粗嘅缺點，前者會有額外收費
⓶ 一般只有兩級快門：中速與慢速
⓷ 相片數量多，拍攝需時

📸例子：

Kodak Ektar H35、Olympus Pen EE、Ricoh Auto Half、Diana Mini、Konica Autorex