有無人同小編一樣係Lomography Fans？創意攝影龍頭Lomography又出新菲林啦！LomoChrome Color ’92 ISO 400 彩色負片，標榜以全人手製作，每卷都獨一無二。

新菲林LomoChrome Color ’92採用感光度400，平衡菲林顆粒量，適合唔同光線環境下拍攝，除咗可以日頭影，黃昏等低光環境都啱用！成像細膩，色調偏冷冽，陽光照射之下質感柔和迷人，稍為豐富嘅顆粒感帶畀人90年代嘅懷舊復古氣息，黃昏時影出嚟嘅相，小編更加係覺得有啲油畫感。

至於菲林名稱'92，其實代表住1992年，Lomography誕生之年，「在1992年，一股神秘的力量包圍住我們：隨處可見大膽的時尚、劃時代的流行音樂，以及源源不絕的底片熱情。」Lomography表示，為咗紀念、致敬黃金年代嘅精神與產物，就決定研發推出全新彩色菲林配方，希望重現黃金時代嘅標誌性色彩與光芒，延續底片攝影嘅精神。

小編個人覺得呢隻菲林vintage味真係好濃，獨特嘅色調表現與恰到好處嘅顆粒感，無論咩場景同光暗環境影，都有種經典復古魅力！