【菲林教學】如何沖菲林？電影菲林需時較久？6種菲林不同沖掃方法！

【菲林入門101】如何沖菲林？電影菲林需時較久？6種菲林的不同沖掃方法！

Posted By Jane Cheung on July 2023

上次小知識講完有關沖菲林嘅一啲基本知識，近排都多咗客人上嚟沖黑白 / 電影菲林，咁我哋都會同大家講需時3-4星期，要等耐小小🤏🏻但大家都好似好驚訝，所以今次 #菲林入門101，小編就決定出個沖菲林下集，同大家講吓沖唔同菲林有咩唔同❗點解沖某啲菲林又要等咁耐❗

註：有關正片與負片分別，請睇返 #菲林入門101 正片vs負片篇

1️⃣彩色負片

- 使用藥水：C41
- 沖洗方法：機沖
- 需時：1-3天

2️⃣黑白負片

- 使用藥水：B&W
- 沖洗方法：手沖 / 機沖
- 需時：5-7天

👉🏻黑白負片使用嘅藥水與彩色負片並不相同，但一部沖機同一時間只能放到一種藥水，所以黑白負片，一般都係手沖，手沖要自己加藥水、沖洗、晾乾，步驟較沖機自動沖來得繁複，故需時較耐，最近銅鑼灣都新添咗黑白沖機，但黑白負片數量不多時，較少開機沖，所以客人拎黑白菲林上嚟沖，都要預等耐小小呀~

3️⃣電影菲林

- 使用藥水：ECN-2
- 沖洗方法：ECN-2沖洗程序
- 需時：3-4週

👉🏻電影菲林，顧名思義用作拍電影，以往電影要快速過片，所以電影菲林表面都有一層石墨，捲動時更流暢，但沖洗時，就要用到電影菲林專用ECN-2沖洗程序，使用不同藥水，更要去除石墨先能夠重現底片色彩，步驟更為繁複，需時都最耐 (唔想等ECN-2沖，可考慮專門出產電影菲林嘅牌子Cinestill、Reflx Lab，佢哋嘅菲林已預先除碳，用標準常見C41沖洗即可，亦可使用ECN-2沖，但由於菲林本身已除石墨，就會出現本來被抑制嘅光暈現象，但化開嘅光暈可謂電影菲林一大特點，夜景燈光拍出來仿如霓虹燈，vintage味濃👵🏻 睇相呢度👉🏻 #菲林知多啲)

4️⃣彩色正片

- 使用藥水：E6
- 沖洗方法：機沖
- 需時：3-4週

5️⃣黑白正片

- 使用藥水：E6
- 沖洗方法：機沖
- 需時：3-4週

6️⃣正片負沖

- 使用藥水：C41
- 沖洗方法：機沖
- 需時：1-3天

👉🏻正片負沖，又稱E沖C (E to C)，即唔跟「正途」來沖洗菲林，掉返轉，用負片使用嘅C41藥水，來沖洗本應用E6藥水沖洗嘅正片，為相片帶來偏色、迷幻感；相反，負片正沖，又稱C沖E (C to E)，跟E沖C相反，係用正片使用嘅E6藥水，來沖洗本應用C41藥水沖洗嘅負片，成像顏色反差低，更有可能會出現全藍或全綠影像，香港現時已經無乜沖洗店會提供C沖E服務。