Skip to content
【菲林入門101】新手如何挑選菲林ISO?由零開始講解菲林感光度!

【菲林入門101】新手如何挑選菲林ISO?由零開始講解菲林感光度!

on

最近好多新手客人上嚟舖頭揀菲林,有幾條問題成日都聽到:唔同ISO有咩分別?應該點揀好?邊個啱我?...有見及此,小編為大家整合好晒,今次 #菲林入門101 為大家講解菲林攝影中嘅ISO,新手又可以點樣揀唔同ISO嘅底片❓

▶️咩係ISO感光度?◀️

 

影相嚟講,曝光鐵三角(光圈 、快門、ISO)可謂最最最基本入門要識嘅元素📐而家嘅數碼相機基本上都可以自行調較三大元素,不同光線情況下,可以立即切換ISO;但喺以前菲林年代,ISO並唔可以隨意改變,每款菲林底片都有特定fix死嘅ISO感光度🔆

講返ISO嘅由來,ISO中文係「感光度」,呢個term源自菲林年代,由於不同種類嘅底片對光有不同反應,國際標準組織就用ISO Speed (簡稱ISO) 來分類底片對光嘅靈敏度。ISO以數字100、200、400、800等,來表達感光度高低,ISO愈高嘅底片代表感光能力愈好,又稱快速菲林,ISO愈低嘅底片則對光相對無咁敏感,又稱慢速菲林,而呢個概念都一直沿用至今日嘅數碼相機,用作表示感光元件對光線嘅靈敏度。

簡單嚟講,ISO就係衡量底片對光線敏感程度嘅指標,ISO愈高代表感光能力愈強,喺同樣參數同環境下能夠令相片愈亮;反之則代表感光能力愈弱,相片愈暗。

▶️點解ISO愈高愈多顆粒?ISO愈低畫質係咪愈好?◀️

影開Digital嘅人都知ISO愈高,張相就愈多Noise (噪點),呢個定律套用到菲林攝影身上如是,不過大家習慣叫佢做Grain (顆粒) 。

至於點解ISO愈高,顆粒就愈多?呢個歸因於底片嘅成份,底片上嘅感光乳劑主要成份係鹵化銀,而鹵化銀顆粒愈大先愈容易感光,所以一般而言,高ISO底片,好似800、1000、3200等,影出嚟嘅相嘅顆粒都粗糙明顯;相反,低ISO底片,如100、200等,顆粒則較細緻柔順。

所以,喺完全相同嘅設定與環境之下,底片ISO愈高,顆粒就愈多愈重,不過,咁樣講又是否代表ISO愈低畫質就愈好?如果又係完全相同設定同環境,當然成像會係ISO較低個張相望落清晰一啲,但影開菲林就係喜好個種複古老舊感,都有唔少用家特別鍾愛厚重顆粒感嘅高ISO底片,同時,底片ISO低嘅壞處係會令到快門要調慢、曝光要較大,光線不足情況下,就可能會引致殘影或Out-fo等更差嘅情況🥵

▶️咩情況下用咩ISO嘅菲林?◀️

用咩ISO嘅菲林,其實最重要就係睇光線情況,以135菲林底片為例,一般市面上有ISO 100、200、400、800、1000、1600、3200、6200等嘅底片。

👉🏻100、200:低ISO、慢速底片☀️
因為感光能力弱,所以建議喺室外陽光普照時使用,因為ISO低,出嚟成像細膩清晰,陰陰天影嘅話效果就未必好理想;如果喺室內使用,就要配合閃光燈使用,無閃光燈嘅話,就會曝光不足,有多啲顆粒出現

👉🏻400:中ISO、中速底片☀️☁️🏠
處於中間,屬最萬能廣用,室外、室內、陰天、晴天皆可使用,故此喺顆粒呈現嘅表現都係中等

👉🏻800以上:高ISO,快速底片☁️🏠🌃
由於感光能力能,尤其適合室內、大陰天、晚上使用,晴天時使用亦可,但因為鹵化銀粒子大,成像效果無論點顆粒都比較粒大明顯

嘩,不知不覺打咗咁長!今日嘅ISO課程就去到呢度啦,有咩唔明歡迎下面留言問我哋,都歡迎留言補充/分享你嘅菲林攝影經驗,我哋下次 #菲林入門101 再見👋🏻

Leave your thought here

Please note, comments need to be approved before they are published.

Related Posts

【菲林入門101】甚麼是電影菲林?解構去石墨電影菲林+三大推介!
January 09, 2024
【菲林入門101】甚麼是電影菲林?解構去石墨電影菲林+三大推介!

近年,愈來愈多人玩電影菲林,市面上亦出現不少自捲電影菲林及除碳電影菲林選擇,但究竟甚麼是電影菲林?除碳電影菲林又有甚麼分別?沖洗電影菲林有甚麼不同?今次菲林入門101為大家全面解構電影菲林,更會為大家推介三大電影菲林!

Read More
【新品前瞻】ILFORD母公司 百年歷史Harman史上第一款彩色負片!全新推出Phoenix 200
December 04, 2023
【新品前瞻】ILFORD母公司 百年歷史Harman史上第一款彩色負片!全新推出Phoenix 200

你未必聽過Harman這間公司,但你一定聽過以黑白菲林聞名的ILFORD,而Harman正是ILFORD背後母公司。作為一間生產黑白菲林逾百多年的業內指標,是次Harman於12月1日宣佈推出Phoenix 200彩色負片,可謂菲林界轟動一時的年度消息!事不宜遲,以下立即來看看今次全新菲林的4大亮點!

Read More
Drawer Title
Similar Products